Стив Абот

Филмски продуцент, роден во Брадфорд, Јоркшир, Англија. Симболично, Стив Абот би можеле да го наречеме „филмскиот џентлмен од Брадфорд“.
Интересно е што пред целосно да му се посвети на филмот, во периодот од 1973 до 1979 година, студирал математика на Универзитетот во Кембриџ, каде што дипломирал во 1976 година, а магистрирал во 1980 година.
Во текот на својата богата кариера како истакнат меѓународен продуцент, заедно со својата соработничка Ен Џејмс, останува запаметен како менаџер и продуцент на култната комичарска група „Монти Пајтон“, составена од актери, сценаристи, режисери и продуценти: Џон Клиз, Тери Гилијам, Ерик Ајдл, Тери Џонс и Мајкл Пејлин. Во периодот од 1979 до 1997 година, нивните продукциски компании, „Prominent Features“ и „Prominent TV“, освоија „Оскар“, награда „Сезар“ и неколку награди БАФТА. Како извршен продуцент, Стив Абот стои и зад документарните патеписни серии на Би-Би-Си, чиј автор е Мајкл Пејлин, меѓу кои се Brazil, Around the World in 20 Years, New Europe, Himalaya и Great Performances. Тој е продуцент и извршен продуцент на култните комедии A Fish Called Wanda, Brassed Off, American Friends, Blame It on the Bellboy, Fierce Creatures и Splitting Hairs. Особено бил горд во 2009 година, кога неговиот роден град Брадфорд беше прогласен од УНЕСКО за првиот град на филмот во светот. Абот ја предводеше иницијативата во текот на нејзините први десет години. Член е на Американската академија за филмски уметности и науки (AMPAS), Британската академија за филмска и телевизиска уметност (BAFTA) и Европската филмска академија (EFA).

